شوبعرفني موقع عربي ترفيهي ثقافي شبابي
بسم الله والصلاة والسلام على رسول الله
كل سنة وانتم طيبين
نشوف الصورة الاولية للسابلية ابن عم البتيفور
المقادير
1 وربع كوب زبدة – نص كوب سكر بودرة (ممكن تخلوه كوب الا ربع لو بتحبوه حلو) – بيضة – 3 كوب ونص دقيق – معلقة ونص صغيرة بيكنج باودر – فانيليا – رشة ملح
الطريقة
نحط الزبدة في الطبق ولازم تكون لينة بس مش كتير
نضربها بالمضرب شوية
نضيف السكر البودرة ونضرب لحد ما تبيض وتنفش
نضيف البيضة مع الفانيليا ونضرب
النتيجة حتكون كريمة بتلمع وخفيفة لو وصلتي للمرحلة دي يبقى تمام لان دا اساس السابليه
نضيف الدقيق المنخول مع البيكنج باودر ونضرب باقل سرعة فقط علشان الدقيق يختفي
الناتج عجينة لينة لاننا في الصيف بس لو في الشتا حتكون ملمومة وحلوة
ما تضيفيش دقيق لاننا لما نفردها حنرش دقيق
ننزل العجينة على بلاستيك
ونلفها وندخلها التلاجة ربع ساعة
بعدين نشتغل على رخامة ولو مطبخك حر الافضل على ورق زبدة
نرش دقيق وناخد حته من العجين
ونفردها بسمك 3 ميلي تقريبا
وبعدين نحط القطاعات في الدقيق ونقطع
ونعمل من كل شكل 2 ونرصهم في الصينية
وبعدين ناخد القطاعات الصغيرة ونفرغ السابلية في الصينية علشان الشكل يفضل جميل
ونشيل الشكل الصغير بالسكينة
خلاص الصينية جهزت للخبز
نحطها في فرن سخن على 170 لمدة 10 دقايق تقريبا
نسيبهم يبردوا في الصينية لان لو شلناهم حيتكسروا
وبعدين نحط كل اتنين على بعض ونرصهم في صينية علشان نسهل علينا الحشو
خلصنا خبز والسابليه برد
نروح نجيب مربى النوع اللي نحبه وممكن كريمة شيكلاته (جناش)
ناخد البسكوته الكاملة ونقلبها
نحط معلقة من المربى
ونحط البسكوتة المخرومة فوقيها ونضغط بالراحة
ونشكل حسب اللون او الطعم اللي نحبه
وبس نقدمها
ان شاء الله تجربوه ويعجبكم
كل سنة وانتم طيبين
في امان الله
