شوبعرفني موقع عربي ترفيهي ثقافي شبابي
بسم الله نبتدى
مقادير البسوسة
3.5 كوب سميد 1.5 كوب زبدة سائلة 1.5 ملعقة بيكنج بودر صغيرة 2 كوب جوز هند مبشور ناعم كوباية زبادى كبيرة كوباية صغيرة ماء او ممكن لبن زى ما تحبى ( المقادير تكفى صينية صغيرة ) 
الطريقة ياقمرات
سهلة جدآ جدآ بجد
هنحط السميد وجوز الهند فى طبق ونقلبهم
وبعدين هنحط الزبادى والزبدة السايلة والبكينج بودر سوا وبرضه نقلب كويس اوى لحد ما يطلع فقاقيع بسيطة ويتمزجوا
بعدين هنضيفهم على خليط السميد وجوز الهند ونقلب كويس جدا لحد ما يختلطوا ببعض
وبعدين هنضيف الماء او اللبن ونقلب كويس برضه زى كده
هتكونى مسخنة الفرن شوية وبعدين هتدخليها على نار هادئة ربع ساعة وبعدين تعلى النار شوية وتسيبيها ربع ساعة تانية لحد ما الجوانب تحمر وبعدين تطلعيها وترشى شوية جوز هند وتسيبيها كمان 5 دقايق
لو حبيتى تحطى لوز او بندق او اى مكسرات حطيهم فى الاول عشان يتحمروا كويس
فى الوقت ده نكون بنعمل القطر ( الشربات ) بتاعها
مقاديره بسيطة جدآ
2 كوب سكر و 1.5 كوب ماء ملعقة صغيرة ليمون . ملعقة صغيرة ماء ورد
نحطهم على النار ونقلب المكونات مع بعض ونسيبهم شوية لحد ما تلاقيه تقل شوية ترفعيه من على النار وتسيبيه لحد ما يبرد
وبعد ما تطلعى البسبوسة من الفرن هتسقيها بالقطر ( الشربات ) وتسيبيها لما تبرد وتقطعيها عشان مش تتهرى وبألف هنا وشفا على قلبك انتى واللى هتقدميها ليهم
وده شكلها بعد ما طلعت من الفرن وحطيت الشربات عليها
وكمان ريحتها جميلة آوى وهتعرفى انها استوت من الريحة الحلوة
وزوووم إن
